يا عيني يا عيني! مبروك للبنانيين! أخيراً لقينا الحل السحري لكل ويلات هالبلد!
يعني هلّق وزارة العتمة، اللي ماسكتها القوات، رح تصير وزارة النور؟ والكهربا رح تجي 24/24، والمولّدات رح تتقاعد، وفاتورتين الكهربا رح يصيروا فاتورة وحدة؟ ولا الذكاء الاصطناعي رح يبعثلنا صورة لمبة ضاوية ويقلّنا: تخيّلوا إنو في كهربا؟ 💡
يعني المي رح توصل عالحنفيات؟ ولا رح نفتح الحنفية ويطلع صوت اصطناعي يقول: «عزيزي المواطن، المياه متوفرة نظرياً، يُرجى المحاولة لاحقاً»؟ 🚰
يعني مصاري المودعين رح ترجع؟ واللي حاطط تحويشة عمره بالمصرف رح يقدر يسحبها بالدولار الحقيقي، مش بدولار اصطناعي؟ ولا الذكاء الاصطناعي رح يحسبلنا قديش خسرنا ويقلّنا: «نأسف للإزعاج»؟ 💸
يعني الإنترنت رح يصير سريع عنجد؟ والـ5G رح يوصل لكل لبنان وببلاش؟ ولا رح يصير عنا ذكاء اصطناعي بسرعة إنترنت بتحتاج ربع ساعة لتحمّل صورة صباح الخير؟ 📱
يعني الطرقات رح تتزفّت؟ والحفر رح تختفي؟ ولا السيارة رح تصير ذكية لدرجة إنّها تحفظ مواقع الجور وتتفاداها لحالها؟
يعني الزحمة رح تنحل؟ ومن بيروت لجونية ما بقى بدنا ساعتين؟ ولا الذكاء الاصطناعي رح يقترح علينا نمشي عإجرينا؟
يعني النفايات رح تنشال من الشوارع؟ والبحر رح ينضف؟ والأنهار رح تبطل مجارير؟ ولا رح نعمل فلتر بالذكاء الاصطناعي يخلي البحر أزرق والزبالة ورود؟
يعني المستشفيات رح تستقبل المريض قبل ما تسأله عن التأمين؟ والدواء رح يتوفر؟ والضمان رح يدفع؟ ولا الروبوت رح يقلّك: «سلامتك، بس جيب موافقة مسبقة»؟
يعني المدارس الرسمية رح تتصلّح؟ والجامعة اللبنانية رح تاخد حقها؟ والأساتذة رح يقبضوا رواتب بتكفّيهم؟ ولا رح نستبدل الأستاذ بروبوت بيشتغل بلا راتب وبلا إضراب؟
يعني الرواتب رح تكفّي لنهاية الشهر؟ والأسعار رح تنزل؟ والليرة رح تستقر؟ ولا الذكاء الاصطناعي رح يعلّمنا كيف نعيش براتب ما بيكفّي أسبوع؟
يعني الشباب رح يلاقوا شغل ببلدهم؟ والمهاجرين رح يرجعوا؟ ولا الذكاء الاصطناعي رح يصير يكتب رسائل الوداع بالمطار؟
يعني القضاء رح يصير مستقل؟ والملفات رح تتحرّك؟ والفاسد رح يتحاسب مهما كان اسمه وطايفته وحزبه؟ ولا الذكاء الاصطناعي رح يطلعله: «عذراً، هذا الملف محمي بكلمة سر سياسية»؟
يعني انفجار مرفأ بيروت رح توصل تحقيقاته للحقيقة والعدالة؟ ولا رح نطلب من الذكاء الاصطناعي يعيد بناء المرفأ بصورة ثلاثية الأبعاد ونعتبر القضية خلصت؟
يعني الأملاك البحرية المحتلّة رح ترجع للدولة؟ والتهرّب الضريبي والجمركي رح ينضبط؟ ولا الروبوت رح يتعلّم بسرعة إنو في ناس فوق القانون؟
يعني البلديات رح يصير معها مصاري؟ والإنارة العامة رح تشتغل؟ والمجاري ما بقى تفيض مع أول شتوة؟ ولا الذكاء الاصطناعي رح يبعثلنا تنبيه: «انتبه، الشارع صار مسبح»؟
يعني الدفاع المدني والإطفائية والإسعاف رح يصير عندهم تجهيزات حديثة؟ ولا رح نبعت روبوت يعتذر من الناس لأنو المعدات مش متوفرة؟
يعني الجنوب رح يتعمّر؟ والنازحين رح يرجعوا عبيوتهم؟ والتعويضات رح تنصرف؟ ولا الذكاء الاصطناعي رح يرسم بيت افتراضي لكل عيلة خسرت بيتها؟
يعني الأمن رح يتحسّن؟ والسلاح المتفلّت رح ينضبط؟ والحدود رح تنحمى؟ ولا رح نحط كاميرات ذكية تصوّر المشاكل بدقة 4K ؟
يعني معاملات الدولة رح تخلص بلا واسطة وبلا رشوة وبلا «ارجع بكرا»؟ ولا رح يصير الروبوت يسألك: «حضرتك مدعوم من مين؟»؟
يعني المواطن رح يقدر ينجز معاملة من تلفونه بدل ما يلفّ على عشر دوائر؟ ولا رح يصير لازم يجيب إخراج قيد للروبوت، وتصديق مختار، وطابع مالي إلكتروني مقطوع من السوق؟
بس أهم سؤال يا دولة الرئيس…
الذكاء الاصطناعي رح يقدر يفهم كيف بلد فيه بحر وأنهار بلا مي، وفيه معامل كهربا بلا كهربا، وفيه مصارف بلا ودائع، وفيه جامعات بلا إمكانيات، وفيه شباب متعلّم عم يهاجر، وفيه دولة بتقبض ضرائب وكأنها سويسرا وبتقدّم خدمات كأنها بإجازة مفتوحة؟!
والأهم من كل هيدا…
رح نعلّم الذكاء الاصطناعي كيف يصلّح الدولة، أو السياسيين رح يعلّموه كيف يخرّبها؟! 😂
لأنو إذا دخل الذكاء الاصطناعي على الإدارة اللبنانية، منخاف بعد شهر يصير يطلب واسطة، وبعد شهرين يطالب بمخصّصات، وبعد ثلاثة أشهر يعيّن قرايبه مستشارين!
وبآخر السنة بيطلع تقرير رسمي:
«حققنا إنجازاً تاريخياً في التحوّل الرقمي… وقد تم تشكيل لجنة لدراسة إمكانية تشكيل لجنة أخرى لمتابعة تطبيق الذكاء الاصطناعي».
يا دولة الرئيس، نحنا مش ضد الذكاء الاصطناعي… نحنا بس بدنا شوية ذكاء طبيعي بإدارة البلد، قبل ما نستورد الذكاء من برّا!
شو هالحكي؟! 🇱🇧
فقرة ساخرة –بقلم محمد قاسم
