يا جماعة السيادة، يا حرّاس هيبة الدولة، ويا معالي وزير العدل عادل نصّار… زفّوا الخبر ووزّعوا البقلاوة: طلع للبنان خمس «أصدقاء» جدد سهرانين عَ راحتنا من عوكر للندن، مروراً بأستراليا وكندا، ووصولاً لكوكب اليابان!
إيه، منصدّق!
سفارات الدول الخمس أصدرت بياناً مشتركاً باسم «أصدقاء لبنان» بتأكّد فيه دعمها القوي لحكومة لبنان بـ«حصرية السلاح بيد الدولة»، وإنو الدولة وحدها صاحبة القرار بشؤون الحرب والسلم!
يا عيني عَ الصداقة… صداقة «خدمة زبائن» خمس نجوم، بس بنظام الفوترة الأميركية!
بس السؤال اللي بيطرح حاله: هول «الأصدقاء» اللي قلبهم عم يتقطّع عَ سيادة لبنان، وين كانت نظّاراتهم السيادية وقت كانت دبابة «الميركافا» الإسرائيلية المتمركزة بتلة الشريقي ببلدة الخيام عم تقصف أطراف إبل السقي؟!
ولّا قذائف «الميركافا» ما بتخرق السيادة، لأنها جاية بـ«ترانزيت دبلوماسي» ومختومة من واشنطن؟!
خلّونا نقرا البيان حبة حبة، لأنو الكوميديا السوداء هالمرّة عابرة للقارات:
لحظة شوي! «بمنأى عن أي تدخل سياسي»؟!
يعني خمس سفارات أجنبية بتجتمع، وبتكتب بيان، وبتسمّي ملف قضائي لبناني بالاسم بالتزامن مع إصدار قاضية التحقيق العسكري الأول غادة أبو علوان مذكرتَي توقيف وجاهيتين بالملف، وبتحطّ القضاء اللبناني تحت مجهر «الامتحان الدولي»… وبعدين بتقلك: «إوعى حدا يتدخّل بالقضاء»!
يا سلام! يعني إذا لبناني سأل ليش الشاب اللي عم ينقل عتاد لمواجهة إسرائيل بيتهدّد بعشر سنين أشغال شاقة، بيصير «تدخّل سياسي سافر»… أمّا إذا السفيرة بعتت جدول أعمال للمحكمة من عوكر، بيصير اسمه «تشجيع دبلوماسي لحكم القانون»؟!
ناقص يبعتوا قاضي تحقيق من أستراليا، وكاتب ضبط من أوتاوا، ومباشر محكمة من طوكيو، لحتى تكتمل «استقلالية القضاء اللبناني»!
بس استنوا، لأنو الفقرة التالتة بالبيان هي تحفة الموسم:
«أصدقاء لبنان» شافوا إنو «من الضروري الحصول على التزام علني وواضح من جميع أعضاء مجلس النواب وجميع الأحزاب، يؤكدون فيه تأييدهم لتصريحات رئيس الجمهورية ورئيس مجلس الوزراء» (الأخبار)!
عم تقروا منيح؟ «التزام علني وواضح من جميع النواب والأحزاب»!
يعني النواب اللي انتخبهم الشعب اللبناني، مطلوب منهم هلّق يصفّوا عَ الدور قدّام السفارات، وكل واحد يمسك الميكروفون ويسمّع الدرس: «أنا بصمت عَ البيان، فيّي آخد نجمة ذهبية وبطاقة VIP ؟»!
طيب، وإذا نائب ما بصم؟ بتفصلوا عنه اشتراك الديمقراطية، ولّا بتحولوه عَ قصر العدل اللي أصلاً مهدّد بقطع الكهرباء بسبب تراكم الفواتير؟!
وخلّينا نحكي بصراحة: بنفس النهار اللي كانت فيه السفارات الخمس عم تراجع مسودّة «السيادة الكاملة على جميع الأراضي اللبنانية»، شو كان عم يصير عَ هيدي الأراضي بالذات؟
- إذا دورية إسرائيلية قطعت الطريق الرئيسي ببلدة ديرميماس ومنعت الأهالي يفوتوا ويطلعوا من ضيعتهم… «الأصدقاء» بيكونوا بفرصة الغدا!
- وإذا الجرافات الإسرائيلية شقّت الطرقات بوادي شبعا، والفرقة 36 الإسرائيلية سرحت ومرحت بين مرتفعات الشقيف ونهر الليطاني… الرؤية عند السفارات بتصير ضبابية!
- وإذا المسيّرات رمت قنابل صوتية حدّ جامع العامرية بالمنصوري وفوق كفرشوبا، والرشاشات مشّطت كروم الزيتون فوق روس المزارعين… رادار السيادة بيكون خارج الخدمة!
- أمّا إذا نُقل صندوق ذخيرة عَ كوع ضهر البيدر لمواجهة هيدا الاحتلال نفسه… بتستنفر خمس دول من تلات قارات، وبيعلنوا حالة الطوارئ القضائية!
يعني المزارع الجنوبي اللي عم يقطف زيتون تحت رصاص التمشيط الإسرائيلي ما إلو سطر ببيانكم، بس الشاحنة اللي عَ ضهر البيدر صارت تهديد للأمن القومي من واشنطن لطوكيو؟!
يا أصدقاء المصلحة، ويا جماعة البيانات المعلّبة:
بدكم الدولة اللبنانية تستعيد سلطتها السيادية الفعلية؟ ممتاز، ونحنا أول مين بدّو!
تفضّلوا ارفعوا «الفيتو» الأميركي عن تسليح الجيش اللبناني بمنظومات دفاع جوي وصواريخ نوعية تحمي السما والحدود، وألزموا حليفتكم إسرائيل تنسحب من التلال والأراضي المحتلة وتوقف قصف القرى وتجريف الوديان .
أمّا تمنعوا عن الجيش السلاح اللي بيحمي، وتغطّوا للمحتل السلاح اللي بيعتدي، وتطلبوا من اللبنانيين يوقّعوا تعهّد علني بترك أرضهم مكشوفة تحت عنوان «صداقة لبنان»… فهيدي مش صداقة، هيدي بوليصة استسلام مجانية !
غريب أمركم بلبنان والله…
وبآخر الحلقة، منكتشف إنو «أصدقاء لبنان» شايفين الكرتونة عَ كوع ضهر البيدر بالتفصيل المملّ، بس مش شايفين دبابة «الميركافا» بنصّ الخيام، ولا الجرافة بوادي شبعا، ولا المسيّرة فوق كروم الزيتون!
واللبيب من الإشارة يفهم… والسلام!
#شو_هالحكي
